ओसाका, जापान। नेपालमा आएको विनाशकारी बाढीपहिरोबाट ठूलो जनधनको क्षति भएपछि मातृभूमिको दुःखमा ऐक्यबद्धता जनाउँदै जापानका विभिन्न स्थानमा आयोजना हुन लागेका हरितालिका तीज विशेष कार्यक्रमहरू रद्द तथा स्थगित हुने क्रम बढेको छ।

नेपालका विभिन्न क्षेत्रमा बाढीपहिरोले जनजीवन प्रभावित बनाएको र धेरै परिवार दुःख तथा पीडामा रहेको अवस्थामा तीजको नाचगान र मनोरञ्जनभन्दा विपत्तिमा परेका नागरिकको उद्धार, राहत र सहयोगलाई प्राथमिकता दिनुपर्ने भावना जापानस्थित नेपाली समुदायमा देखिएको छ। यही भावनाका साथ विभिन्न संघसंस्था तथा आयोजकहरूले पूर्वनिर्धारित कार्यक्रमहरू रद्द तथा स्थगित गर्न थालेका हुन्।

यसै क्रममा बिहुँकोट समाज जापान, कान्साई क्षेत्रीय समितिको आयोजनामा आगामी सेप्टेम्बर १०, २०२६ मा ओसाकामा आयोजना हुने भनिएको ‘तीज विशेष २०२६ ओसाका’ कार्यक्रम रद्द गरिएको छ।

नेपालमा उत्पन्न विपद्को दुःखद परिस्थितिलाई मध्यनजर गर्दै कार्यक्रम रद्द गर्ने निर्णय गरिएको हो। आयोजकले कार्यक्रमसँग जोडिएका कलाकार, सहभागी, सहयोगी तथा शुभेच्छुकहरूप्रति परिस्थितिलाई बुझेर साथ र सहयोग गरिदिन अनुरोध गरेको छ।

यसअघि बाग्लुङ समाज जापान र बिहुँकोट समाज जापानको संयुक्त आयोजनामा क्युस्युमा आयोजना हुने तीज विशेष कार्यक्रम–२०२६ पनि रद्द गरिएको थियो। आयोजकले कार्यक्रमका लागि संकलित रकम तथा कार्यक्रम रद्द भएपछि बचत हुने रकमसमेत नेपालका बाढीपहिरो पीडितको राहत तथा उद्धारमा सहयोग गर्ने निर्णय गरेको छ।

त्यस्तै जापानका अन्य स्थानमा आयोजना हुन लागेका तीज विशेष कार्यक्रमहरू पनि रद्द तथा स्थगित हुने क्रम जारी छ। कतिपय संघसंस्था तथा आयोजकले कार्यक्रमका लागि छुट्याइएको रकम बाढीपहिरो पीडितको सहयोगमा उपलब्ध गराउने निर्णयसमेत गरेका छन्।

हरेक वर्ष जापानमा रहेका नेपाली समुदायका लागि तीज आपसी भेटघाट, संस्कृति संरक्षण र खुसी साटासाट गर्ने महत्वपूर्ण अवसर बन्दै आएको छ। तर यस वर्ष मातृभूमिमा प्राकृतिक विपत्तिले निम्त्याएको पीडाका कारण धेरैले उत्सवलाई थाती राखेर पीडितको दुःखमा साथ दिने बाटो रोजेका छन्।

विदेशमा रहे पनि मातृभूमिको पीडालाई आफ्नै पीडा सम्झँदै जापानवासी नेपाली समुदायले देखाएको यो ऐक्यबद्धताले विपत्तिको समयमा नेपालीबीचको एकता, मानवीय संवेदना र सामाजिक उत्तरदायित्वको सन्देश दिएको छ।

नेपालमा बाढीपहिरोमा परी ज्यान गुमाउनेहरूप्रति भावपूर्ण श्रद्धाञ्जली, शोकसन्तप्त परिवारजनप्रति गहिरो समवेदना तथा घाइतेहरूको शीघ्र स्वास्थ्यलाभको कामना गर्दै जापानस्थित नेपाली समुदायबाट राहत तथा सहयोगका प्रयासहरू पनि अघि बढिरहेका छन्।