–गोविन्दबहादुर कुँवर

तपाईँसँग पीडा छ

मसँग पीडा छ

उहाँसँग पनि पीडा छ

यसरी हामी सबैसँग पीडा छ

त्यो भित्र कतै बसेको हुन्छ

थपक्क

त्यसैले

सकभर अनुहारमा देखिन्न

जतन गरेर बाधिँएको छ

मनको बाँधले त्यो

र त

हत्पति कतै पोखिन्न

पीडा विनाको

को छ र खै यो दुनियाँमा ?

पीडा छैन भने पनि

कतै न कतैबाट

एउटा न एउटा

आफैंले खोजेर ल्याउँछ मान्छेले

किनभने बाँच्नै सक्तैन ऊ पीडा विना

भिरालो सतहमा बगेको पानीजस्तो

मनको गहिरो खोंचमा

त्यो कतै न कतै

अलिकता भए पनि थेग्रिएर बसेको हुन्छ

पीडामा शक्ति छ या उर्जा ?

मलाई त भन्न मन लाग्छ

कहाँ छैन पीडा ?

घरमा, देशमा

जङ्गलमा, समुन्द्रमा

मनमा, आकाशमा

र

समयका हरेक काल-खण्डमा !

भोटेओडार, लमजुङ