जापानमा विदेशीको ‘व्यवसाय–प्रबन्धन भिसा’ कडाइ, पूँजी ५० लाख येनबाट ३ करोड येनमा

टोकियो, अगस्ट २६ (एजेन्सी)।
जापान सरकारले विदेशी नागरिकलाई दिइने व्यवसाय–प्रबन्धन भिसा (経営・管理ビザ) को मापदण्ड कडाइ गर्ने भएको छ। अबदेखि भिसा पाउन आवश्यक पूँजीको शर्त हालको ५० लाख येन (करिब ५००万円) बाट बढाएर ३ करोड येन (करिब ३०००万円) भन्दा माथि निर्धारण गरिएको छ।

यससँगै, कम्तीमा एक जना स्थायी कर्मचारी नियुक्ति अनिवार्य हुनेछ। साथै, भिसा लिन चाहने व्यक्तिसँग ३ वर्षभन्दा बढीको व्यवसाय वा प्रबन्धन अनुभव अथवा प्रबन्धनसम्बन्धी स्नातकोत्तर तह वा सो सरहको शैक्षिक योग्यता हुनुपर्नेछ।

नयाँ नियमअनुसार, व्यवसाय योजना दर्ता गर्दा प्रमाणित लेखापाल वा मध्यम–साना उद्योग परामर्शदाताबाट अनिवार्य प्रमाणिकरण गराउनु पर्ने व्यवस्था गरिएको छ।

हाल जापानमा यस भिसा लिने विदेशीको संख्या करिब ४१ हजार पुगेको छ, जुन पाँच वर्ष अघिको तुलनामा ५० प्रतिशतले वृद्धि भएको हो। तर, पेपर कम्पनी (नाम मात्रको कम्पनी) स्थापना गरी भिसा लिने दुरुपयोग बढेको भन्दै संसदमा आलोचना हुँदै आएको थियो।

अन्तर्राष्ट्रिय दृष्टिले हेर्दा, दक्षिण कोरियामा पूँजीको शर्त ३ अर्ब वोन (करिब ३२ मिलियन येन) रहेको छ भने अमेरिकामा १० देखि २० लाख डलर (करिब १५००–३०००万円) आवश्यक पर्छ। यस हिसाबले जापानको मापदण्ड हालसम्म अपेक्षाकृत सहज मानिएको थियो।

सरकारले भिसाको दुरुपयोग रोक्ने उद्देश्यले नयाँ नियम ल्याए पनि, यसले जापानमा व्यवसाय सुरु गर्न चाहने साना तथा नयाँ उद्यमी विदेशीहरुलाई थप चुनौती खडा गर्ने देखिएको छ।