-पार्वती भट्ट

१

प्रेममा पनि घात हुन्छ, प्रतिघात हुन्छ

र पनि मन किन, उसैको आबाद हुन्छ

सुनेकी थिएँ मौनतामा पनि त हुन्छ प्रेम

जहाँ आँखा आँखाको मिठो संवाद हुन्छ ।

२

कोही आयो खुब चलायो, धमिलो बनायो

प्रेमको शान्त पोखरीमा, खै ! केके खनायो

पढाउन त पढायो प्रेमकै पाठशाला खोलेर

विडम्बना ! न फकायो प्रेमपूर्वक न मनायो ।

३

घरी घरी तिम्रो तस्विर, छुन मन लाग्छ

तिमीसँगै हाँस्न अनि, रुन मन लाग्छ

एकान्तमा छातीमाथि, निदाएर प्यारा !

सधैंभरि तिमीसमीप हुन मन लाग्छ।

४

जिन्दगीका तानाबाना, बुनी साध्य छैन

छोड्दा पनि छैन साध्य, चुनी साध्य छैन

बहनु छ हावासित तैरिनु छ पानीसित

हरे ! समयको वेग पनि, थुनी साध्य छैन ।

                             तुपानडाँडा, डडेल्धुरा