साहित्यकार एवं नेपाली अमेरिकन मैत्री संघ (नाफा)का अध्यक्ष सन्तोष लामिछानेको उपन्यास ‘अल्टिमेट अाकाश’ एक समाराेहबीच अमेरिकाको म्याडिसनमा सार्वजनिक गरिएकाे छ ।

वरिष्ठ लोक गायक एवम् अवैतनिक नेपाली महावाणिज्य दूत प्रेमराजा महत, कवि गोवर्धन पूजा, साहित्यकार कृष्ण बजगाईंलगायतले संयुक्त रूपमा कृतिकाे विमाेचन गरेका हुन् ।

उक्त कार्यक्रमका लागि बेलायतबाट विशिष्ट अतिथि साहित्यकार कृष्ण बजगाईंले कृतिको समीक्षा गर्दै नेपाली डायस्पोरिक साहित्यमा ‘अल्टिमेट आकाश’ एउटा कोशेढुंगाको रुपमा रहने धारणा व्यक्त गरे । अमेरिकी भूमिमा युवाले गर्नुपरेको संघर्ष र सफलताको कथा रहेको उक्त उपन्यासकाे विषयवस्तु, भाषा शैली रोचक रहेको बजगार्इंकाे भनाइ थियाे ।

अमेरिका निवासी उपन्यासकार लामिछानेका पिता डा.भरत लामिछानेले कृतिका तीतामिठा कुरा कोट्याउँदै, कृतिको सकारात्मक पक्ष र चुनौती माथि आफ्नो धारणा राखेका थिए ।

अवैतनिक नेपाली महावाणिज्यदूत प्रेमराजा महतले देशबाट टाढा भए पनि देशकै तर्कनामा रहेर नेपाली भाषा र संस्कृति उकास्न र नयाँ पुस्तालाई सिकाउन लागिपरेको नेपाली समुदाय देखेर आफूलाई खुशी लागेको बताए ।

साहित्यकार गोवर्द्धन पूजाले सिर्जनात्मक लेखनमा निरन्तर अभ्यासको खाँचो औँल्याए । उपन्यासकार लामिछानेले अमेरिकी भूमिमा नेपाली युवाका भोगाईलाई उपन्यासको रुप दिएको बताउँदै केही हदसम्म भए पनि यसबाट नेपाली युवा लाभान्वित हुन सक्ने धारणा राखे ।

नाफाले आयोजना गरेको १०९ औं महाकवि लक्ष्मीप्रसाद देवकोटाको जन्म जयन्ती एवम् ‘नाफा साहित्यिक साँझ २०७५’ बिचमा उक्त बिमोचन कार्यक्रम भव्यरुपमा सम्पन्न भएको थियो । प्रतियोगी तथा अप्रतियोगी गरी जम्माजम्मी ३५ वटा कविता वाचन समेत गरिएको साे कार्यक्रम नाफा अध्यक्ष समेत रहेका सन्तोष लामिछानेको सभापतित्वमा सम्पन्न भएको थियो ।

उक्त उपन्यास ‘आमाजोन’बाट अनलाईनमार्फत बिक्री भइरहेको उपन्यासकार लामिछानेले जानकारी दिए । उपन्यास बेलायतस्थित समकालीन साहित्य प्रतिष्ठानले प्रकाशित गरेको हो ।